“Միացում” ազգային նախաձեռնությունը ապրիլի 7-ին Ուրբաթ ակումբում տեղի ունեցած մամուլի ասուլիսի ընթացքում ներկայացրել է մի հաղորդագրություն, ուր մտահոգություն է հայտնել Հայաստանի իշխանության վարած քաղաքականությամբ, այն որակելով “Հայաստանի եւ Ղարաբաղի անվտանգության հիմնասյուները խարխլող”: “Միացումն” այդ եզրակացությունն արել է վերլուծելով 2009 թվականի հունվար մարտ ամիսների քաղաքական զարգացումները:
“Միացումը” համարում է, որ Հայաստանի իշխանությունը չնայած “հուժկու” հակահարված ստացավ հանրության գիտակից խավերից, կապված տարածքները հանձնելու իշխանական քաղաքականության հետ, այդուհանդերձ շարունակվում է Հայաստանի 1991 թվականից ի վեր որդեգրած “անհեթեթ” քաղաքական գիծն Արցախի հարցում:
Դատապարտելով որեւէ տարածքի հանձնման քայլը եւ արձանագրելով, որ այդ ուղղությամբ Հայաստանի հասարակության մեջ ավելանում է պետականության հիմնարար արժեքների եւ առկա սպառնալիքների գիտակցումը, “Միացումը” կարեւոր է համարում ազատագրված տարածքների բնակեցումը: “Հայաստանի ազատագրված տարածքի ուղղությամբ ներգաղթի խթանումը պետության կարեւորագույն պարտավորություններից է, իսկ վերաբնակեցման գոտում վերաբնակիչների իրավունքների եւ օրինականության պաշտպանությունը` ազգային անվտանգության գերակա խնդիրներից մեկը: Վերաբնակեցման գոտում արտառոց չափերի հասած պաշտոնեական դիրքի չարաշահման, զանգվածային ապօրինությունների, թալանի եւ կաշառակերության, կլանային կամ գավառապատկան հովանավորչության բոլոր դրսեւորումները պետք է կանխվեն եւ պատժվեն օրենքի ամբողջ խոստությամբ”, կարծում է “Միացում” նախաձեռնությունը:
Նախաձեռնության անդամ Ալեքս Քանանյանը, որն ինքը ազատագրված տարածքի բնակիչ է, համարում է, որ տնտեսական ճգնաժամը հարմար պահ է ազատագրված տարածքներում կապիտալ շինարարություն սկսելու համար: Ալեքս Քանանյանի խոսքով, ազատագրված տարածքում այդուհանդերձ կա բնակիչների մի հաստատուն խավ, որը երբեք չի լքի իր բնակավայրը եւ կպայքարի ազատագրված տարածքում ապրելու իրավունքի համար: Քանանյանը նշում է, որ այդ տարածքներում ոչ միայն կան պատմական հուշարձաններ, այլ կան արդեն ներկայիս շիրիմներ եւ բնակիչները երբեք չեն լքի այդ տարածքները:
Իսկ նախաձեռնության մեկ այլ անդամ, ակադեմիկոս Ռաֆայել Ղազարյանի այրին` Գրիզելդա Ղազարյանը, կոչով դիմել է գեներալներին, նրանց ասելով, որ Երեւանում դղյակ կառուցելու փոխարեն թող ազատագրված տարածքներում գյուղերը վերականգնեն, քանի որ կան գյուղեր, ուր հոսանք չկա: Գրիզելդա Ղազարյանը գեներալներին ասում է, որ նրանց զոհված մարտընկերները կյանքը չտվեցին այն բանի համար, որ իրենք հղփանան Երեւանում:
“Միացում” նախաձեռնության անդամ, ռեժիսոր Տիգրան Խզմալյանն էլ նկատել է, որ պետք է ամեն ինչ անել թույլ չտալու համար, որ հայ-թուրքական սահմանի հարցում շոշափվի նաեւ Ղարաբաղի խնդիրը:
No comments:
Post a Comment