Երեկ Սերժ Սարգսյանը մի ուշագրավ հրամանագիր է ստորագրել, որով ԼՂՀ նախկին նախագահ Արկադի Ղուկասյանին նշանակել է հատուկ հանձնարարություններով դեսպան: Ավելին, Սարգսյանը Ղուկասյանին շնորհել է նաեւ Հայաստանի Հանրապետության արտակարգ եւ լիազոր դեսպանի դիվանագիտական աստիճան: Հիշեցնենք, որ այն բանից հետո, երբ Արկադի Ղուկասյանը թողեց ԼՂՀ նախագահի պաշտոնը, վերջինիս որեւէ պաշտոնում նշանակելու մասին խոսակցությունները չէին դադարում: Ընդ որում, բոլորին էլ հայտնի էր, որ դեռ Ղուկասյանի` նախագահ եղած ժամանակից էին սկսվել այդ խոսակցությունները, ինչը ենթադրում էր, որ Ղուկասյանն ինքն էր այդպիսով փորձում հոգալ իր քաղաքական ապագան: Ավելին, խոսակցություններ կային նաեւ այն մասին, որ Սարգսյանն ինքը, դեռ ՀՀ ՊՆախարար եղած ժամանակ, Ղուկասյանին ասել էր, թե երբ «դառնա» ՀՀ նախագահ, Ղուկասյանին պաշտոն է տալու: Ամիսները, սակայն, անցնում էին, իսկ Ղուկասյանին ոչ մի պաշտոն էլ չէին տալիս: Ու թե ինչն է հանկարծ ստիպել Սարգսյանին նման ուշագրավ պաշտոնի նշանակել Ստեփանակերտի իր գրասենյակում իր համար սուսուփուս աշխատող Ղուկասյանին` առայժմ դժվար է ասել: Մի բան, սակայն, պարզ է` անգամ ԼՂՀ ԱԳ նախարար աշխատած տարիներին դիվանագիտական հատկություններով երբեք աչքի չընկած Ղուկասյանին այս պաշտոնին նշանակելը Հայաստանում միայն բացասական արձագանք կստանա: Ի դեպ, նշենք, որ սա առաջին դեպքն է, երբ ՀՀ-ում հատուկ հանձնարարություններով դեսպան է նշանակվում:
Հայկական ժամանակ
No comments:
Post a Comment